مهما تشوف ف الدنيا هموم ...

مهما تشوف ف الدنيا هموم ...
وتغيب شمسك وسط غيوم ...
مهما دموعك تسكن عينك ..
خلِى قُصادك حلم سنينك ...
عافر أكتر .. ومتيأسش ....

مهما تحس غُناك مسجون ...
مهما يقولوا عليك مجنون ...
مهما يحاولوا يقصوا جناحك ...
لو بيضيق الكون ، وبَراحك ...
اصرخ أكتر .. ومتسكتش ....

مهما القسوة تزيد حواليك ...
وتشوف غدر الناس بعينيك ...
واللى ف يوم تفتكره حبيبك ...
يجرح قلبك أوى و يسيبك ...
اعشق أكتر .. و متكرهش ...

مهما الفجر هيبقى بعيد ...
وتكون وسط الزحمه وحيد ...
مهما الحزن يدارى حروفك ...
سيب أحلامك تهزم خوفك ...
عيشها بقلب جرئ .. متمُوتش ..

لـ الشاعرة : دعاء عبد الوهاب