أنا المقسوم ما بين....

أنا المقسوم ما بين أيوه و بين لأه ....
أنا المسجون ف عمر و لحظة مش فارقة ....
أنا اللى ف عز ضعفى عنيد ....
أقرب ألقى ضلى بعيد ....
و اشوف حلمى خلاص ف الإيد ....
تقوم إيد الألم سابقة


وانا التايه ما بين الحلم والحاصل
ومهما اشكى بيبقى صوتى مش واصل
وصابر ع اللى فات والجاى
ومحروم م الامل والضى
لا انا ميت ..ولا أنا حى
وحتى العمر بيفاصل


أنا اللى داريت دموع الروح ورا الضحكة ....
أنا اللى الخطوة واخدانى و مفيش سكة ...
أنا العاقل وانا المجنون ...
أنا الدوشة ف وسط سكون ...
أنا اللى يادوب هاجيب الجون ...
رمانى البخت ع الدكة


انا اللى ف قلبى مش باين على وشى
وبحبس دمعى جوايا ومبينشى
بدادى ف زمنى وبحايله
وحلمى قصادى مش طايله
ولما حاولت اوصله
زغرلى وقاللى يلا امشى


أنا اللى صاحبت أحلامى مصاحبتنيش ....
ملامحى ناديتها ف مرايتى معرفتنيش ....
و لسه الروح بتستنى ...
تفارق نارها للجنة ....
و اشوف الشمس واتمنى ....
دفاها يعدى مرة الشيش

دعاء عبد الوهاب